Hizkuntza-baliabideen artean, hiztegien webgunean (hiztegiak.elhuyar.eus) 956.137 lagun (2018an baino % 8 gehiago) sartu dira zalantzak argitzeko, eta ia 57 milioi kontsulta egin dituzte (2018an baino % 22 gehiago).

Itzultzaile automatikoari dagokionez (itzultzailea.eus), ia bost milioi hitz itzuli dituzte erabiltzaileek urteko azken hilabetean, eta bereziki nabarmentzekoa da abenduaren 3ko datua, 259.748 hitz itzuli baitzituen sistema automatikoak egun horretan. 54.269 bisita izan ditu itzultzailea.eus webguneak hilabete bakarrean, eta 3.426 mugikorretan instalatu dute aplikazioa.

Kultura zientifikoa sustatzeko Elhuyarrek gizartearen eskura jartzen dituen baliabideen artean, Teknopolis saioa da arrakastatsuena, 2019an 600.000 ikusle izan baititu, gutxi gorabehera. Bestalde, zientziazale eta ikasle askok jo dute zientzia.eus webgunera ere, eta Elhuyar aldizkariak eta Norteko Ferrokarrilla irratsaioak ere erabiltzaile-kopuruak areagotzea lortu dute.

Hezkuntza-arloan, berriz, Zientzia Azoka izan da arrakastatsuena: Euskal Herriko 31 ikastetxetako 308 gaztek (neskak 188, eta mutilak 120) 90 proiektu aurkeztu dituzte. Bestalde, Bizilabe proiektua beste 11 herritara hedatu da 2019an.