Codefest udako eskoletan murgilduta dabiltza aste honetan Donostian. Astelehenetik hasita, baliabide urriko hizkuntzak biziberritzea helburutzat harturik, komunikazio elektronikorako tresna eraginkorrak eskaintzen eta haiek nola erabili erakusten ari dira Tabakaleran. Astebeteko ikastaro praktikoan, egungo hizkuntza-teknologiak aztertu eta aplikazioak garatzen ari dira, auzolanean, hizkuntzalari, software-ingeniari eta ikasleak taldeka jarrita.

Eskola irekia da, eta edonork har dezake parte; hizkuntzarekiko grina eta haren alde zerbait egiteko gogoa dira ezinbesteko baldintza bakarrak.

Elhuyar eskolen antolatzaileen artean da, eta, horrez gain, zuzenean parte hartzen du bi proiektutan: «Behagunea» eta «Hizkuntza anitzeko galdera-erantzunak erronka jokoetarako Wikipediarekin».

Bestalde, bihar hitzaldia emango du parte hartzen ari garen Europako proiektu baten buruak: Claudia Soria, Consiglio Nazionale delle Ricerche (Pisa, Italia) Hizkuntzalaritza Konputazionaleko Institutuko ikertzailea. DLDP proiektuan ari gara harekin batera lanean.

Ostiralean amaituko dira eskolak, eta, asteari akabera emateko, Wikipedia editathon bat egingo da. Hizkuntza txikietan arreta jarriz, Donostiari buruzko artikuluak idatzi eta ahalik eta hizkuntza gehienetara itzuliko dira.

Informazio gehiago: codefest.dss2016.eu